Жыткавiчы

Кароткія гістарычныя звесткі. 

Жыткавічы ўпершыню згадваюцца ў Мэтрыцы Літоўскай у 1500 годзе ў складзе Вялікага княства Літоўскага, а потым Рэчы Паспалітай. Тут разьмяшчаўся маёнтак Ожарынскіх, дзейнічала Сьвятатроіцкая царква. Затым беларускія землі ўвайшлі ў склад Расейскай імпэрыі (1793). Ужо тады ў Жыткавічах налічвалася 79 двароў, праходзіў гасьцінец Мазыр—Давыд-Гарадок, дзейнічала паштовая станцыя. З 1795 па 1924 г. Жыткавічы былі цэнтрам воласьці ў Мазырскім павеце Менскай губэрні. У склад воласьці ўваходзіла 13 паселішчаў. Насельніцтва маёнтку займалася ў асноўным сельскай гаспадаркай, бортніцтвам.

З будаўніцтвам у 1886 годзе Палескай чыгункі (Лунінец-Калінкавічы), якая пралягала празь мястэчка Жыткавічы, тут стала разьвівацца прамысловасьць. Яна была прадстаўленая прадпрыемствамі па перапрацоўцы драўніны й прадукцыі сельскай гаспадаркі. З гэтага часу вёска пачала вылучацца як самая вялікая ў акрузе. Ужо ў пачатку 20 стагодзьдзя Жыткавічы па колькасьці насельніцтва абышлі старажытны Тураў.

17 ліпеня 1924 годзе Жыткавіцкая воласьць была перайменаваная ў Жыткавіцкі раён. Да 193 7году Жыткавічы заставаліся мястэчкам, а з 27 верасьня 1938 году атрымалі статут гарадзкога пасёлка, і на той час у ім пражывала 4,3 тыс. чалавек.

У гады Вялікай Айчыннай вайны тут дзейнічала патрыятычнае падпольле. У баях за вызваленьне пасёлка загінулі 139 ваяроў, яны пахаваныя ў братэрскай магіле ў сквэры.

З 1971 году Жыткавічы атрымалі статут гораду, сюды была ўключаная суседняя вёска Дварэц.

Архітэктурная планіроўка.

Дарогі дзеляць горад на 3 часткі. Сучасная забудова каменная, новыя дамы ўзводзяцца ўздоўж бульвара. Шматпавярховыя дамы пабудаваныя ў мікрараёнах «Азёрны» (пяці-, сямі- і дзевяціпавярховыя), «Усходні» (пяціпавярховыя), «Зубраня» (пяціпавярховыя) й «БМУ» (2 пяціпавярховых дома, усе астатнія двухпавярховыя).

Адукацыя.

У горадзе працуюць: 4 агульнаадукацыйныя школы, школа-інтэрнат, вечаровая сярэдняя школа, дзіцячая музычная школа, прафэсійна-тэхнічные вучылішча № 182, школа мастацтваў, спартовая школа, Дом школьнікаў, раённы й гарадзкі дамы культуры, бібліятэкі, музэй, цэнтар фальклёру, цэнтар карэкцыйна-разьвівальнага навучаньня й рэабілітацыі, сацыяльны прытулак. Выдаюцца газэты «Вольныя навіны» й «Новае Палесьсе».

Фізічная культура, спорт і турызм.

У Жыткавічах маюцца спартыўныя збудаваньні й пляцоўкі:

• гарадзкі стадыён на 400 пасадкавых месцаў
• плавальны басэйн
• міні-басэйн
• іншыя залі й пляцоўкі (школьныя спартыўныя залі й г.д.)